Fjordane Trekkhundklubb er per dags dato er den einaste aktive trekkhundklubben på Vestlandet mellom Bergen og Trondheim😃

Idrettslaget vårt vart stifta den 24.september 2022 i samband med haustsamlinga vår på Strynefjellet, og vart godkjent i Norges idrettsforbund med Noregs Hundekjørerforbund som særforbund den 1.november 2022.🐶

Fordi me har hovudsete i vakre Nordfjord som byr på høge bratte fjell og djupe fjordar liker me å kalla oss "Noregs brattaste trekkhundklubb". Me er ein veksande klubb og har i dag medlemmer frå Sogn i sør til Ålesund i nord, og med medlemmer innan dei fleste greinar frå snøreløping/canicross og snørekøyring til mellomdistanse og langdistanse, med alt frå hobbykøyrarar til dei som satsar i løp og konkurranse. Aldersspennet per i dag strekkjer seg frå 6 til 60 år. Me er ein klubb for alle med interesse for å bruka hund i trekk, uavhengig kva rasa eller type hund du har, talet på hundar du har, ferdigheitsnivå, alder eller kjønn. Her er alle velkomne!😊

I løpet av året arrangerer me mellom anna haustsamling, fellestreningar, vintersamling og julebord for medlemmene i klubben og andre som ønskjer å vera med. På desse samlingane arrangerer me gjerne konkurransar og aktivitetar i kjend hundekøyrarstil for alle i alle aldrar. I tillegg til sosiale samlingar vil me også tilby ulike kurs for medlemmene i klubben, auka kompetanse og erfaringsutveksling tenkjer me er bra for å skapa eit godt og triveleg samhald. Me er ein klubb i stadig utvikling, og me ønskjer at medlemmene våre skal ta del i utviklinga slik at me kan halda fram med å vera ein klubb for alle.

Det er mange greiner og formar for hundekøyring, men éin ting har dei til felles… det er den einaste idretten der gutar og jenter, menn og damer, konkurrerer mot kvarandre uavhengig av alder, kjønn og funksjonsnivå. Ein likestilt idrett der det er samspelet mellom hund og menneske som er viktigare enn kva kjønn eller kor gamle me er, det er me stolte av!😊

Bur du i det som før var Sogn og Fjordane, eller på Sunnmøre for den saks skuld, har ein eller fleire hundar du liker å bruka til ulike former for trekking og synest det kunne hatt gøy å vorte ein del av eit veldig hyggjeleg og ålreit miljø? Då tilrår me deg å ta kontakt med oss her på Facebook, på mail til fjordanethk@gmail.com eller logg deg inn for å bli medlem her på sida vår.

Velkommen i Fjordane Trekkhundklubb, Noregs brattaste Trekkhundklubb!🐶😃